30 aña di servicio

Sr. Franklin Dijkhoff a cumpli  30 aña di servicio di telecomunicacion recientemente.Franklin Dijkhoff a inicia su carera 30 aña pasa dia 16 di Augustus 1979 como clerk den departamento di boekhouding di Telefoondienst cu e tempo ei tabata situa na Hendrikstraat. Na e momentonan ei tabatin e projectonan andando en coneccion cu e expansion di e red telefonico pa Oranjestad.  Na luna di september 1980 Franklin a bira  Klerk 1ste Klasse, despues na januari 1985 el a wordo promovi pa Hoofdklerk, na 1989 el bira Adjunt-commies y na januari 1993 el a wordo promovi pa Adjunt-commies 1ste Klasse. Dia 1 di juli 2003 Franklin a bai over cu e compania SETAR N.V. den funcion di Medewerker Financiële Administratie den e departamento di Boekhouding. Den transcurso di e añanan technologia moderno a continua di haci su entrada continuamente y naturalmente cu tur e cambionan cu a cuminsa bin. Mientras tanto, Franklin ta recorda cu ela mira con for di nada, e edificio pa technische dienst y magazijn a  keda construi na Sero Blanco.  Franklin Dijkhoff ta sigui splica cu den transcurso di tempo e avanse riba e tereno di telecommunicacion tabata inmenso. “Antes ta un paar di servicio so Telefoondienst tabata ofrece cu tabata e telefoon di cas y yamada internacional. Despues cu Landsradiodienst y Telefoondienst a bira un solo compania  na aña 1986 a bini aserca telegram, telex y telefonia.”, asina ela bisa. Tabata na aña 1984 cu a reemplasa e  machine di “boek in” stukken pa un PC (personal computer) cu un software di “grootboek”  di e compania Apple Mackintosch. “Un aña so mi a traha grootboek riba e PC aki, ya cu na 1986 despues cu a join cu Landsradio nos a traha cu un pakete financiero Hulandes yama Bons pakket. Na aña 1992 nos a muda for di Hendrikstraat pa Edificio Administrativo nobo na Sero Blanco trahando keto bay cu bons pakket te cu Mei  1997.  Despues di esaki nos  a bay over cu un pakete financiero Mericano cu yama People Soft version 5.1 Te awe nos ta usando e mesun sistema aki cu durante aña naturalmente a conoce su upgradingnan y actualmente nos ta preparando pa e siguente upgrading di e pakete pa People Soft 9.0 na October venidero.”, asina Franklin a splica.

Franklin ta gusta su trabou semper pa e motibo aki mes cu e ta den un lugar caminda semper tin cambio y inovacionnan. Apesar cu e ta traha cu bukinan financiero, e ta experencia tur e desaroyonan continuo cu tin den nos compania SETAR NV. Franklin Dijkhoff ta casa cu Marlin Dijkhoff Lacle y nan tin dos yui muher Frangeline di 23 aña cu ta haciendo su estudio di Social Studies and Management na UNA y Franzienne di 19 aña di edad cu ta actualmente na Colegio Arubano. Den su oranan liber e ta gusta traha cu su matanan den hardin, wak un bon pelicula y tambe scirbi storia y poema. Franklin Dijkhoff te hasta a yega di gana premionan internacional cu su poema encuanto di un choller cu ta desea di cambia su bida cu yama: “E rayo nobo di Solo”.  Tambe ela publica na 2006 su prome buki di poesia cu e titulo:”Emocionnan di mi Alma”.  Actualmente e ta trahando riba un poema di 40 strof scirbi den e idioma Hulandes cu cual e ta bai competi cu ne na Hulanda. Franklin ta conoci den SETAR pa su dedicacion y responsabilidad pa trabou. Palabranan di Pabien ta bai pa Franklin pa su aniversario.