Aña pasa oktober, SETAR a participa den un proceso di bid hunto cu 21 otro compania local y internacional pa gana e proyecto di ‘Video Surveillance System’ di Aruba Airport Authority N.V. (AAA). SETAR hunto cu e compania di camaranan avansa Avigilon hunto cu nos otro partnersnan a resulta ganador di e proyecto grandi aki.
Remarkabel ta pa menciona cu esaki ta un di e proyectonan di mas grandi cu SETAR a logra. E ‘Video Surveillance System’ ta un sistema moderno cu mas di 300 camara di varios tipo instala paden y pafo di AAA. E camaranan special aki ta programa cu e ultimo software pa brinda AAA un visibilidad maximo. Asina aki AAA por mehora su servicio y e seguridad di nos turistanan, nos localnan viahando y e empleadonan cu ta traha na Aeropuerto Internacional Reina Beatrix.
Despues di varios luna di trabou unda cu varios colega, certifica pa Avigilon, a traha den oranan di marduga haciendo trabounan di preparacion y instalacion, SETAR ta haci entrega di e proyecto completa oficialmente na AAA.
Como SETAR, nos ta orguyoso di por entrega un proyecto di e magnitud aki. Cu esaki SETAR ta demostra cu banda di e servicionan cu nos ta ofrece, tambe nos ta ofrece otro tipo di productonan di calidad y cu garantia.
