SETAR ta contento pa anuncia su partnership cu Chadwick Tromp, e prestigioso Beisbolista den Major League Baseball (MLB) di Atlanta Braves.
E colaboracion entre SETAR y Chadwick Tromp riba e tereno di Beisbol ta simbolisa un aliansa pa reinforsa e importancia y e desaroyo di deporte riba nos isla. Beisbol ta un di e deportenan mas gusta y mira na Aruba y tin hopi talento scondi entre nos hobennan local. Chadwick ta un atleta dedica cu curason grandi pa promove Beisbol riba Aruba. Y hunto cu SETAR lo desaroya diferente proyectonan pa nos comunidad.
E trayectoria di Chadwick Tromp den mundo di beisbol tin cualidadnan cu SETAR ta admira y ta desea di promove. Su dedicacion y esfuersonan a logra cu Chadwick a yega MLB y ta formando parti di Atlanta Braves. Cu e partnership ta desea di stimula cambionan positivo riba nos isla. Lo introduci diferente iniciativa riba tereno di desaroyo hubenil y deporte pa nos comunidad.
Algun di e actividadnan cu lo wordo realisa hunto cu Chadwick ta Campnan di Beisbol pa duna hobennan un oportunidad pa ricibi training di nivel halto y bishitanan na scol. Asina ta desea di crea mas interes den Beisbol cerca nos hobennan y pa motiva nan pa sigui lucha pa nan soño nan.
Keda pendiente di nos pagina web www.setar.aw y pagina di Facebook pa mas informacion.
