Hopi yamada y pregunta a yega na SETAR pa sa di e fecha 13-4-2019 y kico e ta nifica y te cu diamars ultimo durante un rueda di prensa esaki a keda divulga.

SETAR como compania nacional di telecomunicacion semper ta haya importante pa aporta na Aruba cu diferente evento, promocion y projectonan. E biaha aki SETAR ta organisa un evento special pa e hubentud di Aruba, “Youth Tech Event” cu lo enfoca riba e impacto cu futuro di tecnologia tin pa un persona, Aruba y mundo henter.

E evento aki ta wordo organisa manera un conferencia, unda cu lo tin ‘speakernan’ local y internacional, workshop, presentacion, un ‘Experience Hall’ tur bou di un solo dak. Tambe ta saca e scol ganador di e projecto Hack-a-Ton “Island of the Future – Agriculture”.

Pa e workshop lo tin coding y fotografia y pa presentation tin online personal branding y mucho mas. Tambe tin e ‘Experience Hall’, unda cu lo tin diferente boothnan cu ta mustra e studiante con un ‘Smart Student Room’ ta, e studiantenan lo por crea nan mesun YouTube Video, nan lo por experimenta cu ‘Lighting Effect’ y nan por crea nan mesun musica/beat cu ayudo di nos artista international Jeon.

Tambe tur studiante presente por participa den weganan di Augmented Reality, Drone Racing, y hopi mas. Durente e dia SETAR ta trece 2 speakers, Dr. Ryan R. Peterson cu lo elabora riba e impacto di tecnologia pa futuro y di merca SETAR ta trece Mr. Steve Brown, un futuristico cu bista con e mundo ta impacta dor tecnologia y kiko esaki ta nifica pa e hubentud. Durante henter e evento e 6 scolnan cu a participa den e Hack-a-Ton ‘Island of the Future- Agriculture’ lo demostra nan projecto y na final di dia lo saca e team di e scol ganador maximo di e Hack-a-Ton.

Tur esaki riba un solo dia, cual ta 13 di april venidero, na Hilton Hotel, cuminsando for di 8or di mainta te cu 6or di atardi. Hilton Hotel lo percura pa tin un bar y cushina bon surti. Pa por participa na e Youth Tech Event di SETAR, e studiante entre edad di 12 pa 18 aña mester registra riba www.setar.aw.