Diamars dia 5 di september 2017, Mandy Lacle a bira e di 3 studiante cu ta ricibi e RBC-SETAR Thesis award. A selecta Mandy pa e prestigioso premio di RBC-SETAR pasobra su tesis ta bon structura, cla, concreto hunto cu un cuadro teorico profundo.
Srta. Lacle a recibi e premio den un Aula di Universidad di Aruba completamente yen den e ceremonia anual di Student Awards. Mandy a recibi un cheque for di RBC Royal Bank (Aruba) N.V. y un tablet for di SETAR. Farrah Harteveld, representante di RBC Bank y Suzy Maduro, Corporate Communication Officer di SETAR a haci entrega di regalonan aki.
Mandy a gradua como e di 15 graduado di e programa di estudio ‘Organization, Governance and Management’ (OGM) na Universidad di Aruba na mei ultimo. Pa su tesis Mandy a investiga cua factornan ta influencia e exito di managers hende muhe (femenino) den sector publico na Aruba.
Mandy a entrevista varios cabasentanan feminino di e departamentonan publico pa studia nan experienca – den terminonan di factornan cu por conduci na exito y/of cu por fungi como barera- den nan carera. E resultado di su investigacion ta cu tin descriminacion riba base di genero den Aruba su sector publico. E fundeshi di esaki ta e rolnan existente cu ta yuda construi e definicion di generonan den terminonan social. E construcion y definicion aki ta diferencia entre generonan (masculino y femenino) den terminonan di patronchinan clasico conservativo y ta resulta den diferencia den expectativanan pa hende femenino y hende masculino (entre otro na pia di trabao). For di e investigacion ta sali cu tin un necesidad na maneho cu ta basa riba comprencion pa situacionnan specifico cu muhernan ta haya nan aden.
E tesis di Mandy ta hopi valido pa Aruba, pasobra e ta un base pa por traha maneho cu lo por yuda o sea facilita muherman den na carera professional.
Universidad di Aruba, particularmente e departamento di ‘Organization, Governance and Management’, ta felicita Mandy cu e logro aki y ta desea e tur clase di exito cu su trabau na Arubabank. Tambe ta gradici RBC y SETAR pa nan contribucion pa cu e Thesis Award 2016-2017. Pa mas informacion riba e estudio OGM, bishita e website di Universidad di Aruba na http://www.ua.aw/OGM y e pagina di Facebook cual ta https://www.facebook.com/pages/University-of-Aruba-OGM-Organization-Governance-Management-FAS/
