Desde 17 di mei 1965, nos ta celebra “World Telecommunication and Information Society Day”. E dia aki tambe ta marca e fundacion di e International Communication Union (ITU) cu ta specialisa den tecnologianan di informacion y comunicacion (ICTs). E aña aki ITU ta enfoca riba e tema di “Digital technologies for older persons and healthy aging”.
E envehecimento di e poblacion mundial lo ta e tendencia demografico cu lo defini e siglo XXI – sin embargo, sociedadnan rond mundo ta lucha pa wak ki oportunidadnan e tendencia aki por trece cune.
Telecomunicacion y tecnologianan di informacion y comunicacion (ICTs) ta hunga un papel importante den e asina yama envehecimento saludabel y tin e potencial pa mehora e bida di adultonan mayor y nan famianan y e comunidadnan. Entre otro door di yuda personanan construi ciudadnan mas inteligente, combati discriminacion basa riba edad na luga di trabou, garantisa inclusion financiero di adultonan mayor, salvaguardia e independencia y apoya miyones di dunadonan di cuido rond mundo.
Na Aruba durante e ultimo añanan marca pa e pandemia di COVID-19 nos a mira e importancia di telecomunicacion y ICTs pa nos adultonan mayor pa por a keda conecta cu famia, haci pagonan online y pa entretenimento na cas.
SETAR como compania a aporta na esaki door di duna varios tayer y presentacionnan conhuntamente cu fundacionnan cu ta enfoca riba nos adultonan mayor. Tayernan, entre otro, riba e tema di uzo di Smartphone, WhatsApp, YouTube y mucho mas. Ademas, SETAR a comparti informacion di e facilidadnan cu MiSETAR ta ofrece, paketenan cu tin pa nos adultonan mayor y con pa paga bo recibo di SETAR, sea online of na nos Self-Service Kiosk.
Como nos compania nacional di telecomunicacion, SETAR tin un rol sumamente importante pa contribui na e envehecimento saludabel di nos adultonan mayor na Aruba, door di aporta na engrandece e conocemento digital di nos adultonan mayor y minimalisa e drempel cu tin pa uza tecnologianan nobo y sigui innova.
